金融世界博大精深，金融產品種類又五花八門，對於門外漢嚟講，要記住啲產品名稱真係會記到頭都大。熊貓債、武士債、洋基債呢啲金融產品嘅花名相信大家都聽得多，絲絲近日又認識多一個有趣嘅新名詞，叫做「點心債」，唔知大家又有冇聽過呢？原來點心債即係香港投資者好熟悉、金融機構在港發行嘅人民幣債券。
絲絲近日閱讀渣打香港發表嘅一份經濟報告，就睇到佢哋以點心債嚟形容每逢喺本港推出都大收旺場嘅人債。絲絲喺度諗，熊貓債及武士債嘅取名用意顯而易見，因為熊貓係中國嘅國寶，而武士就代表喺日本備受尊重嘅行業，用嚟形容嗰啲由外國金融機構去當地發行並以當地貨幣為面值嘅債券，形象較為突出。
幫點心債改名嗰位仁兄，莫非覺得香港人係民以食為先，以食品為名嘅產品會較容易令人留下深刻印象？無論點樣，只要唔係做大鱷嘅點心，相信幫人債改乜嘢名，港人都唔會太介意嘅！
余絲韻