絲絲尋日喺中環飯局巧遇已退休嘅港交所（00388）前行政總裁周文耀，冇見一排，佢仍然係官仔骨骨，穿上淺色西裝，精神飽滿，唔通係「無官一身輕」？
絲絲冇問佢之前喺銀行開投資戶口要搞成粒幾兩粒鐘單嘢，但就有問佢點睇佢嘅接班人李小加發表關於人民幣國際化嘅「萬言書」建議？周文耀對本港發展人民幣離岸中心好清晰，亦了解各方言論及建議，但要佢評論，佢就耍手擰頭。
雖然喺香港「封嘴」，但佢話自己有時喺外國一啲場合都會發表吓意見。喺外國發表意見，絲絲自然冇機會聽，佢可唔可以諗吓益吓我哋，等我哋學多啲嘢呢？
佢憑住當年港交所授予嘅認股權，揸住唔少「388」股票，近期「388」水漲船高，唔知佢有冇趁高沽貨套現？
余絲韻