絲絲講場：陸庭龍紮職掌恒生私銀
最近恒生銀行（00011）內部通傳部分部門主管有新調動，絲絲打探下知道，原來係周時喺媒體出現嘅陸庭龍（Alan）下月起將榮升該行助理總經理兼私人銀行及信託服務主管，由佢接掌私人銀行服務亦不無道理，話晒佢喺舊公司亦曾涉獵私人銀行相關業務。
管轄人手多逾十倍
從Alan以後管轄嘅人手數目嚟睇，就知道佢喺恒生嘅事業生涯將更上一層樓，據講Alan出任新職嘅部門，人手超過140人，相對依家任職投資服務嘅人手多出成十倍有多。霎時間要管咁多人，唔知佢覺得係挑戰定係壓力呢？Alan係炒房出身，都見慣唔少風浪，對佢嚟講應該冇問題嘅。
至於現任恒生私人銀行及信託服務主管李佩珊，將會調任基金及結構產品主管，而Alan依家嘅投資服務工作將由袁妙齡接手出任主管一職。
為求證實呢單消息嘅真偽，絲絲都有致電恒生企業傳訊部問個清楚，結果證實絲絲並冇收錯風。
余絲韻