國產級體育品牌李寧終於擊退Adidas，重奪內地第二大市佔率品牌嘅寶座，今年仲話明要「Make the change」，呢個「改變」嘅目標擺明係要搶奪Nike嘅一哥地位，所以家陣李寧成日都話要打造國際品牌形象，甚至喺Nike發迹地兼總部波特蘭市，興建首個中國運動品牌嘅全球設計中心，被當地人大力宣揚為「李寧支紅旗插咗喺Nike後院」。
不過，李寧走向國際化嘅策略就係「去李寧化」，由標籤、廣告口號到管理層，都意味着李寧個人會淡出公眾閃光燈。絲絲與好多「粉絲」一樣，對呢位中國體壇傳奇人物有唔少感情，何況係李寧本人，對住呢個20年嚟一手一腳建立嘅心血結晶品牌，佢雖然同意改變，但同樣受到好大衝擊，所以喺挑選新標識設計稿時，李寧都揀唔落手。有謂「創業難、守業更難」，李寧要力爭世界前五大品牌、全球市佔率逾20%仍路途遙遠，絲絲希望李寧可以堅持到底，將紅旗插勻全球。
余絲韻