絲絲講場：高漢思拎近億元花紅
喺幾個月前，歐元區出現金融危機，搞到歐元係咁跌，以歐洲業務為主嘅思捷（00330），佢哋嘅股票就更加係被沽售對象。思捷早前公布截至六月底止全年盈利倒退約10%，但尋日公司刊出年報，顯示主席高漢思去年總收入大升82%至1.24億元。
除咗加人工，最主要係期內嘅花紅增加咗1.27倍，有成900萬歐元，兌番港紙就高達9,718萬元。絲絲真係唔明，點解公司業績倒退仲可以有花紅分，而且仲分多一倍有多，再睇埋其他管理層，執行董事周福安只係分到125萬元分紅。
力撐公司渡難關
不過絲絲諗深一層，記得之前思捷一班管理層不斷「跳船」，加上歐洲經濟前景唔係咁好，市場一度擔心思捷會爆大鑊，但係好在有高漢思獨力撐住公司，並且為集團籌組新班子，與公司共渡難關，如今總算暫時穩定落嚟，可能因為咁，公司就分多啲花紅畀佢作為獎勵喇。
余絲韻