絲絲講場：鄭海泉出關清減咗
鄭海泉（Vincent）係滙控（00005）嘅Icon之一，早前佢身體抱恙，同公司請咗假，所以呢排好少見佢，即使早前董事局「選美」一事搞到立立亂，佢都冇出過嚟講嘢。難得尋日喺中文大學見到Vincent，可惜佢太忙，絲絲都冇辦法當面問候佢。
邊個咁大面子請得郁佢？咪就係同佢關係密切嘅中大及滙豐囉！滙豐保險及中文大學齊齊辦保險課程，Vincent唔單只係滙豐中國董事長及滙豐台灣區主席，佢亦係中大校董會主席，雙重身份，冇得推辭喇！
Vincent精神相當唔錯，但就清減咗，佢同其他嘉賓一齊，攞住個淋花水壺做足儀式嘅安排。之後佢一直與其他嘉賓有講有笑，唔得閒理會絲絲。絲絲惟有藉呢個機會，祝Vincent身體健康。
滙豐保險夥中大開Course
講番呢個保險課程，內容一啲都唔簡單，係全港第一個由保險公司開辦嘅課程，當中有13堂專題演講，主講者都係滙豐管理層嘅猛人，滙豐保險主席兼行政總裁湯德信（David Fried）同絲絲講，話佢會親自執教第一堂，分享一下對於保險業發展策略及環球趨勢嘅心得。
其實滙豐保險早喺四年前已經與中大合作，過往都有唔少學生喺滙豐保險實習及工作，今次呢個課程嘅優秀學生，更有機會得到滙豐保險長達半年嘅實習培訓。David透露，假如課程搞得有聲有色，佢哋會考慮喺其他市場開辦更多課程，希望可培育多啲保險界人才。
余絲韻