絲絲講場：新店開張摩根呻貴租
摩根投資理財中心觀塘新店尋日正式開業，間舖原來係由「舖王」鄧成波租出，摩根資產管理董事總經理兼香港業務總監潘新江直言租金真係好貴，不過與中環區相比當然有一定折讓，由於可以廣泛接觸東九龍區居民及上班一族，公司亦願意付出貴啲嘅租金，佢哋已有擴展藍圖，計劃陸續再開新舖，選址仍鍾情九龍區。
主力教育投資者
潘新江話，暫時就未有預計生意額要做到幾多，一切都由投資者教育開始，理財中心會一星期開足7日，提供免費投資者教育課程，做到全天候顧問服務，一年講座數目係數以百計。星期日都冇得抖，絲絲都好佩服上下員工嘅努力。
至於有乜嘢新產品吸引投資者？佢話人民幣離岸市場發展空間大，公司亦着眼於發展人民幣產品嘅可能性，可惜依家嘅投資工具有限，喺供求不均嘅形勢下，產品價格會被扯高，投資者未必能夠取得到合適回報。
余絲韻