客戶對銀行服務嘅要求愈嚟愈高，銀行都好識做，識得為客人度身訂造服務計劃，理財策劃就更加要人性化，令到依家嘅理財業務非常吃香。滙豐亦積極吸納生力軍，絲絲聽講佢哋搞咗個「少年財務策劃師大賽」，頭三名可以參觀滙豐分行，冠軍仲可以跟銀行職員工作一日，親身感受吓做銀行職員嘅生活。
滙豐香港區個人理財業務主管麥倩華話，呢個大賽係滙豐理財小百科嘅其中一環，參加同學提交嘅理財計劃好有專業水準。
絲絲見到獎品真係好豐富，頭三名可以有一日時間參觀滙豐分行、了解滙豐歷史等，冠軍甚至有多一日時間，與滙豐亞太區個人理財業務財富管理業務區域主管李錦榮見吓面，同埋跟佢嘅團隊工作一日，親身體驗銀行工作生涯係乜嘢一回事。
讀緊書都可以跟「賓卡」實戰，實在難能可貴，不過唔知夠唔夠時間睇埋銀行職員畀人「捽數」嘅精彩場面呢？
余絲韻