近期多隻新股陸續排隊上市，投資銀行家豬籠入水之餘亦做到氣咳。有i-banker與絲絲傾開偈時，講起將於短期內公開招股嘅四環醫藥集團，聽聞公司主席兼行政總裁車馮升幾有台型。
絲絲暫時未見過車馮升嘅真人，無法證實佢係咪真係咁有台型，但從四環醫藥嘅公司簡介，就知道車總係一名神經內科醫生，今年47歲，專門研究心腦血管類創新藥物。車醫生話救死扶傷係佢作為醫生嘅天職，就係呢一句，大家應該都會對佢有幾正面嘅評價。至於車醫生嘅太太名叫顧津，今年41歲，亦喺四環醫藥度做，係人力資源部副總經理。
近期股市非常暢旺，新股動輒超購幾百倍，首日上市股價升幾成亦司空見慣，日日都有「新股王」誕生，呢隻醫藥股喺車醫生領導下嘅表現如何，大家就要拭目以待喇！
余絲韻