吉利控股喺兩個月前完成收購富豪汽車，呢個世紀收購可以話係「蛇吞象」，吉利董事長李書福完成呢項壯舉後，依家忙緊點樣幫富豪汽車開拓大陸市場。佢最近去咗巴黎參加車展，就趁呢個機會向行家宣戰。
佢形容富豪汽車係一隻「老虎」，係時候釋放佢嘅野性，目標係恢復喺上世紀七、八十年代時期嘅市場領先地位，喺大陸就會與平治、寶馬及奧迪全面競爭。
喺李書福眼中，富豪汽車以往實在太輕視大陸市場，今後將會「改過」，非常重視大陸，佢仲話：「任何跨國企業如果冇參與大陸市場，都好難講係真正成功嘅跨國企業。」就係呢個理論，購併後點樣喺大陸市場取得成功，就成為佢日思夜想嘅事情。
李書福雖然話唔滿意富豪汽車唔重視大陸市場，但對於佢哋某啲作風就好推崇，仲話富豪汽車係一家廣受尊重嘅歐洲豪華汽車企業，好多安全技術都係佢哋首先發明，並不斷有技術突破，例如佢哋發明咗汽車安全帶、汽車安全玻璃，更偉大嘅係佢哋放棄咗呢啲值錢嘅專利，等其他人都可以用。
余絲韻