新鴻基地產（00016）大股東郭氏家族嘅豪門恩怨，隨着郭氏家族酌情信託基金嘅受託人落實重組而展開下集，各路消息人士又四出放風。好似尋日咁，有報道就話據自可靠消息指出，大少郭炳湘已與其他家族成員達成共識，佢將會獲得約200億元，用嚟「另起爐灶」喎，仲話相信事件可以和平解決。
郭炳湘係咪會獲得200億元呢？權威消息就否認有任何共識；對於會否就家族基金重組方案打官司，郭炳湘透過發言人話不作評論。至於新地嗰邊，喺直至截稿前都未有回覆，睇嚟下集應該未有咁快完。
200億元呢個數係多定少，真係見仁見智，但相比郭氏家族信託基金揸住42.09%新地股份權益，總值超過1,400億元，按信託基金分成三份計，「每份」約值489億元，就有啲差距。
絲絲尋日見到新世界發展（00017）董事總經理鄭家純，追問佢有冇嘢講，純官就話唔知內情，人哋嘅嘢唔識喎。
余絲韻