港交所（00388）主席夏佳理及前主席李業廣相遇，究竟會產生乜嘢化學作用？兩人會擦出乜嘢火花？答案原來係互笠高帽。
話說李業廣任主席嘅聯交所歷屆理事聯誼會，早前聯同五大經紀會（中資證券業協會、證券商協會、證券業協會、證券學會及香港網上經紀協會）喺中華總商會設宴，祝賀夏佳理及周文耀分別獲頒授大紫荊勳章和金紫荊勳章，李業廣上台致辭時話識咗夏佳理好多年，大讚對方係叻人，亦非常聰明。
夏佳理亦好識做，回應話自己有好多嘢都喺李業廣度學番嚟，因李業廣有「橋王」之稱嘛！兩人對答得體，確有大將之風，果然係做大事之人。之後李業廣仲代表聯交所歷屆理事聯誼會致送水晶紀念品。
至於周文耀，佢喺台上就話自從退休後，可以做番個普通投資者，佢話選擇去銀行開戶口，但簽文件等手續竟然搞咗佢個幾兩個鐘頭，難怪中策（00235）主席馬時亨早前都將呢單咁搞笑嘅料爆出嚟！
當日飯局由於場地所限，只擺咗12圍，但座無虛席，每個經紀會最多只能安排1至3圍，但絲絲認為最緊要是可以大家聚埋一齊，祝賀人哋之餘，順便聯誼吓都係開心嘅。
余絲韻