市場熱線：中國燃氣修成正果

本地魚缸尋日一開波即衝破23,000點，雖然好快已企唔穩，仲以接近day low收市，不過升咗咁多，有人「食胡」係好正常，魚缸依然處於亢奮狀態，成交過埋千億，創52周新高應冇乜難度。

巴菲特唱好股票已非新鮮事，○八年最差嘅時候佢已入貨，「股神」的確唔係浪得虛名，至於股票抵唔抵買就見仁見智，古勝覺得最緊要係「趁勢」。恒指全日升241點收報22,880點，尋日又有批熊仔死亡，國指升0.7%跑輸畀恒指，但資源股除咗金股之外，其餘只係麻麻。

中升（00881）同大光燈（00165）批股之後都守得住批股價，尤其大光燈真係好落後，依家買股都唔使睇太多基本因素，睇落冇穿冇爛，就合埋眼衝入去短炒一轉。尋日掛牌兩隻新股，一隻冇肉食、一隻更要蝕錢，超額接近500倍嘅創益太陽能（02468）今日登場，暗盤做得幾好。

創益登場有睇頭

創益號稱薄膜太陽能龍頭，但同係做薄膜嘅鉑陽（00566）就跌到五勞七傷，原因係前排13個總值280兆瓦嘅大型光伏電站特許權招標，結果全部用晒晶硅，薄膜全軍覆沒。但創益咁多「大孖沙」入股，應該幾有睇頭。

呢排熱錢係輪流炒，尋日到內房股發威，內需股如百麗（01880）、利邦（00891）同利郎（01234）就回軟。雖然話黃金周樓市銷情好淡靜，但樓價仍然好硬淨，估計班買家睇完一輪又會入市。

至於話做試點嘅房產稅，當局放風出嚟見冇乜人反對，應該離實施之期不遠。房產稅如果作為樓市調控措施，其實係「紙板警察」，不過作為「劫富濟貧」手段就冇乜異議，向有多過一個物業嘅有錢佬收多啲稅係天經地義，亦增加佢哋揸貨嘅成本，對降低空置率都有幫助。

在下早兩日推介嘅燃氣股昆侖（00135）表現算唔錯，今日食髓知味揀來中國燃氣（00384）。正如推介昆侖時所講，天然氣加價25%之後，各地民用燃氣陸續加價，有啲地方加幅仲唔止每立方米0.23元人仔嘅成本升幅，雖然燃氣股前四個月要「硬食」差價，但總算守得雲開。

轉攻加氣站業務

中燃前幾年搏命「爭地盤」，因為地盤唔霸就冇，所以一來孭債多、二來回報低，不過總算多年努力，依家喺祖國總共有百幾個項目，城市燃氣新項目已經買少見少，間公司轉攻天然氣加氣站同液化石油氣，希望愈做愈大。中燃走勢係比較悶，但輪流炒應該就快輪到佢，衝破4.35元阻力位之後有望海闊天空。

戰報

中油燃氣（00603）+21%

帥哥本月四日指中油燃氣股價於整固期間隨時會有突破，昨日創高位1.09元，較推介當日低位0.9元勁升21.11%。

兗州煤業（01171）+10%

古勝周一推介兗州煤業，指煤炭價格上揚有助刺激其股價表現，昨見高位21.4元，升10.3%。

古勝