絲絲講場：滙豐萬聖節巡遊籌款齊扮嘩鬼做善事
今個月嘅月底就係萬聖節，絲絲連扮鬼扮馬嘅衫都準備好，滙豐保險亦趁住呢個節日玩餐飽，佢哋會喺本月三十日舉行萬聖節慈善大巡遊，用做善事方式賀一賀呢個西洋嘩鬼節。滙豐集團總經理兼集團保險業務主管湯德信（David）仲好雄心壯志咁話，去年有1,000人參加扮鬼扮馬，希望今年參加人數可以勁升一倍喎。
唔使跑數都想籌多啲
絲絲記得呢個活動年年都會搞，今年已經係第4次，到時會由滙豐總行巡遊到天星碼頭，David都會參加，不過聽講佢仲諗緊到時扮乜嘢。
呢個萬聖節慈善大巡遊每年都會幫助唔同嘅機構，今年就會用籌到嘅錢資助香港癌症基金會屬下屯門醫院癌症病人資源中心嘅維修及擴建，David話今年目標係籌夠160萬元，而去年就籌咗超過200萬元，點解今年仲少咗？原來佢哋係以受惠團體需要幾多錢去定，始終係做善事而唔係銀行跑數，唔一定要年年增長嘅，如果今年參加人數可以達標，話唔定到時籌款破紀錄呢！
余絲韻