絲絲講場：蘇富比進軍豪宅代理
本港豪宅樓價升勢銳不可當，特別係啲超級豪宅，早前地產界老前輩同絲絲分析，話超級豪宅已被定性為「古董」，賣一件就少一件，根本冇標準價錢可言。做開古董及藝術品拍賣嘅蘇富比，唔知係咪諗住做慣做熟，透過特許經營模式喺香港開設物業顧問公司，實行沾手香港頂級豪宅市場。
主攻逾1500萬豪宅
香港蘇富比國際物業顧問董事總經理羅禮才亦以「藝術品」嚟形容市場上嘅頂級豪宅，佢話頂級豪宅價值係由買家決定，並冇一個標準價值，今次喺香港做埋物業顧問公司，希望慢慢做大，依家公司有20人，希望一年後隊Team能擴充到40人，主要業務係推銷1,500萬以上嘅豪宅。
唔單只香港，佢哋亦睇好內地市場，蘇富比國際地產行政總裁Michael R.Good亦話正喺北京及上海物色新夥伴，希望明年會有結果，搵到之後就可以全面進軍大中華市場。
美聯調高佣金底薪
美聯物業（01200）日前亦調兵，加強香港與內地業務，有老友話，美聯由本月開始，一手及二手代理拆佣比例分別增加7個及1個百分點，去到22%至32%以及10%至35%之間，底薪亦回復金融海嘯前水平，至4,500至7,000元，做咁多嘢，無非係為咗增加市場競爭力。
余絲韻