本港華資大孖沙睇風水大家見得多，原來「老外」都有呢個喜好！話說即將喺本月尾上市嘅友邦保險（AIA），公司高層早前就搵風水師決定上市編號。
坊間傳聞話AIA一班上市軍師早喺一個幾月前，已為AIA安排好「3338」嘅上市編號，諗住「生生生發」咁好意頭，AIA應該會好滿意，而事實上，過去好似港交所（00388）等上市編號有「生」有「發」嘅股票，股價表現都唔錯。殊不知，AIA班高層搵咗風水師睇風水，話「1299」呢個冧巴比較旺佢哋，於是AIA最終敲定以「1299」為上市編號。至於點解「1299」較旺AIA，真係要問吓高人喇！
大家聽完呢個故事之後，唔好再話老外唔信風水喇。絲絲就心諗，唔通AIA要喺亞洲發圍，所以要入鄉隨俗，跟隨我哋東方人嘅傳統習俗？又抑或係AIA喺香港嘅上市計劃一波三折，所以做足晒工夫，唔怕一萬最怕萬一？
AIA上市已經埋牙，尋日仲宣布正式成立由8人組成嘅新董事會。絲絲一睇佢哋嘅董事名單，真係唔講得笑，唔單只個個都係巨星級數，仲包括AIA傳奇人物謝仕榮。謝仕榮一手將AIA搞到有聲有色，佢喺呢個集團服務咗近半個世紀，絕對係有功又有勞嘅老臣子，約去年三月佢突然宣布退休，轉任AIA榮譽主席。依家佢擔任非執董，相信可為集團帶嚟好多寶貴意見。
董事會入面嘅巨星，唔少大家熟悉嘅名字，獨立非執董有港鐵（00066）首席執行官周松崗、出名多計嘅前政務司司長許仕仁及招商銀行（03968）前董事長秦曉，而蘇澤光及謝仕榮就做非執董。
余絲韻