市場熱線：中傳動冇理由唔買

至於花旗魚缸則較為反覆，一日升、一日跌，食粥食飯就要睇遲啲企業派第三季成績表，奇在微軟同「美女」分別被調低投資評級，大有先質低再畀大家驚喜嘅味道。

「美女」喺聽日就會揭開「放榜月」，上季有8成公司成績表好過預期，並非係分析員眼鏡度數唔啱，而係公司管理員給予嘅盈利指引通常都會較為保守，到時成績表好過預期就有晒交代；加埋美金上季狂跌，淨計賺匯水都賺到笑。

孖屐發掘落後股，結果祖國野獸（02628）一發威就升近7%，但同類股平保（02318）則跌3.5%；祖國野獸尋日成交超過60億銀，係第2位嘅工行（01398）嘅3倍幾，淨係窩輪成交已有23億元，令人懷疑係唔係追落後咁簡單？通脹環境其實不利保險股，因為保單持有人會要求較高回報，仲要計埋存款利率、債券收益同埋股市回報能否補數。

農行升勢慢火煎魚

估唔到東瀛接近零息都仲有得再減息，由0.1%降到0至0.1%之間，另會成立5萬億yen基金去買債，希望用寬鬆貨幣政策去壓低口yen，加埋菅直人同溫總卒之有偈傾，東瀛魚缸難得一見倒升1.47%。

福源（01682）做咗今年新股王，愈細粒愈快熟易落鑊，大大隻嘅農行（01288）就要用慢火煎魚。

今日又有兩隻新股登場，但暗盤只係麻麻，呢個禮拜最受人注目係周五掛牌嘅金風科技（02208），夾啱通勝適逢五中全會十五日召開在即落實「十二‧五」規劃，新能源股好似龍源電力（00916）同卡姆丹克太陽能（00712）等昨日已炒起。有統計話，祖國開親大會，開會前股市多數會升，開完會則多數會跌，睇吓今次靈唔靈。

講開金風，不能不提中國高速傳動（00658），因為金風係佢主要客戶，但隻股自從上月十日以每股17.38元批股後就未好過，期間魚缸升到㷫合合，即係中傳動落後咗好幾個身位。

定單接滿錢途光明

批股之後，中傳動股數只係攤薄咗幾個巴仙，但集資22億之後變咗一間淨現金公司，基本因素並冇變壞，今年預測PE得15倍；金風以上限定價，今年預測PE約17倍，斷估上市後有一定表現，所以中傳動照計亦可跟番轉。

中傳動今年嘅突破係3兆瓦大型風電傳動設備，今年產能目標係9,000兆瓦，出年會增到1.2萬兆瓦，而且定單已經接滿，明年PE會降到12倍，揀有實力嘅落後股咪錯過！

戰報

安寧控股（00128）+27%

詩詩九月二十日推介安寧，股價昨日高見0.97元，較推介日低位0.76元，勁升27.63%。

建滔板（01888）+7%

股博士上周二推介建滔板，指業務增長強勁，股價昨日高見8.35元，較推介日低位升7.46%。

古勝