孖妹缸湖遊：創投達人教揀股魔法

港人打進中國創投榜

有「內地點金之手」之稱嘅天泉投資總裁陳鎮洪（Vincent）曾經係眾多新上市公司嘅「天使」，被《福布斯》選為二十大中國創業投資者，係唯一一位上榜嘅香港人，又被精電國際（00710）行政總裁蔡東豪形容為「金錢之王」，投資有紮實嘅分析框架，贏多輸少。

內地民企冇香港中小企咁幸運，借錢要靠自己，最實際係問親朋戚友借，唔成功就要去問銀行借，但國有銀行就傾向貸款畀國企，而大部分又以短期借貸為主，貸款年期只約一年，所以佢哋好多時最後搵創投公司做策略投資者幫手。Vincent擁有19年私募投資經驗，主力發掘早期成長嘅企業，收購項目並協助搞大間公司，最後安排上市套現。寶姿時裝（00589）、真明麗（01868）及中國無線（02369）喺主板上市前，其團隊已經獨家獲得第一輪領投，Vincent目前管理2.5億美元嘅中國基金及2億元嘅中外合作非法人制人民幣基金。

投資期長 主動出擊

陳︰天泉投資總裁陳鎮洪

莉莉︰創投基金幫助小企業壯大，通常投資期要幾耐？

　陳︰我哋主要做500萬至3,000萬美元嘅Deal（交易），多集中於投資民企，策略係先作第一輪投資，第二輪跟投，幫助擴展後就安排上市套現。通常投資一家企業3至5年後就上市，賺錢最多嘅項目一般要長達8至9年，時間愈長，愈可以幫到企業。所以我做基金經理嘅太太，成日話我諗嘢好長遠。

高妹︰揀創投項目好似揀老公咁花時間，點樣發掘好嘅公司呢？

　陳︰好公司要靠自己搵出嚟，唔係等公司叩門，心態與男仔揀女朋友一樣，好嘢都要主動出擊。你一日叫我投資20家公司都得，但冇咁嘅必要，每年投資2至3家優質公司已足夠。其實內地民營企業家比香港嘅家族企業更開通，願意聽取外來意見，例如佢哋正面對接班人嘅問題。我會用6至12個月時間與目標企業混熟，有人會覺得時間太長都未賺到錢，唔太划算，但付出愈多時間，出問題嘅機會愈少。

莉莉︰散戶應該點樣選擇優質企業？

　陳︰聰明嘅公司擁有好嘅「執行能力」，其管理層又有強大韌力，例如○八年起業務融資過程好辛苦，可以堅持到最後嘅人就可以跑出。商業模式夠「創新」都好重要，九九年內地50周年國慶，中央邀請海歸派企業家回流，11年後大多都積極改變企業經營模式，例如百度，「投啱人」就有錢賺。

醫療環保企業具潛力

高妹︰可以睇乜嘢數據，知道公司造假數？

　陳︰慣常會搵會計師行做調查審視帳目，不過成立好耐嘅公司要造假數都好難發現，所以最重要係睇「現金流」，睇吓公司過去點樣維持淨現金流。

莉莉︰幫公司上市後會選擇揸定沽？

　陳︰唔係所有公司都會即時套現，視乎鎖定期，有時鎖定期會設定上市後半年至一年先結束，若公司上市後未反映真正價值，我都唔會考慮賣。

高妹︰消費行業係唔係內地大趨勢？

　陳︰好多內地公司業務靠海外市場，外圍市場靠唔住，未來中國經濟增長都係內銷做主導。但投資傳統消費類行業已講到濫咗，企業間嘅差異化愈嚟愈細，所以我哋集中於行業中嘅專業服務類別，着重品牌知名度嘅公司。醫療健康以及由傳統產業變身加入環保行列嘅公司，亦係創投基金重點項目。

莉莉︰人民幣升值對創投基金有乜嘢影響？

　陳︰內地亦興起人民幣股權投資基金，投資期通常較美元股權基金短線，呢批純人民幣基金嘅典型出錢人，係煤礦及房地產老闆等大有錢佬，佢哋比較性急，要求中小企喺6至12個月上市，最快兩年就要收錢。內地中小板內有七成上市企業都係得到股權投資幫助，部分炒風過盛，事實上，一至兩年咁短時間幫唔到企業之餘，出錢人賺嘅錢又唔多，亦要面對與財力雄厚嘅基礎投資者競爭。

股權投資回報贏大市

高妹︰你係土生土長嘅香港人，喺大陸創業有乜嘢成功之道？

　陳︰○三至○七年係創投高峰期，依家市場競爭大咗，搵人出錢亦難咗好多，但只要「個肚仲係餓」，最後會堅持到底。成功心得係唔好不自量力，明知自己唔係太子黨，投標時就無謂與大公司及太子黨血併，亦要建立口碑及公司文化，將客戶變做自己朋友。

莉莉︰港人對投資創投基金活躍嗎？

　陳︰香港好多有錢嘅家族企業，只識買樓及買股票，多數將錢放喺私人銀行，並分成4份，各三成投資股債，其餘各兩成投資房地產及對沖基金等，反而好少涉獵創投或股權基金。股權投資嘅鎖定期雖然長、風險大，但回報往往高於買股票，以8至10年投資期計算，整體股權投資嘅回報可以跑贏環球股市3%至5%，家族企業應該多了解股權投資。

最多人睇恒指見25000

踏入今年最後一季，獨立基金管理人陸東曾經話，港股第四季表現會跑贏首三季，今年恒指合理值係27,500點。你點睇港股今年底嘅目標價？據今期《東方產經》網上民意調查，截至上周末晚上6時，最多人上望25,000點，佔49.1%；目標價睇27,500點、23,000點及21,000點嘅股友就分別佔20.7%、16.8%及13.4%。

若有料報畀高妹同莉莉或有嘢問，可電郵money.biz@opg.com.hk

高妹、莉莉