市場熱線：兗煤走勢易升難跌

祖國公布新一輪「鬥地主」政策，不過深成指（地主股多數喺深圳上市）反而大幅反彈2.18%，一來覺得今次只係「國十條」之加強版，唔慌有料到，二來不明朗因素已消除。但中央仍留有房產稅作為最後一道絕招，有人話呢招好似「QE2」一樣，只係留來「靠嚇」更好，真正實施之後會好快畀市場消化，到時樓市升勢更冇後顧之憂。

北京辦奧運辦得有聲有色，但印度辦英聯邦運動會就搞到一鑊泡，顯示印度想同祖國拗手瓜仲差幾班，祖國淨計基建呢瓣，越南等國人工幾平都難以搶生意。原本好多人驚祖國人工加得太快會嚇走班廠商，但祖國PMI連續兩個月回升，出口增長依然保持三成以上，A股依然故我原因難明，例如農行（01288）就H熱A冷，但其他中資股喺境外就好渴市，香港上市嘅紅色分子不在話下，喺納斯達克上市嘅祖國互聯網服務供應商藍汎首日即升近倍，上禮拜二掛牌嘅「鄉村基」上市以來勁升76%，呢間快餐連鎖店全國得約100間分店，但PE炒到近50倍，可見「中國熱」幾吃香。

量化寬鬆除咗「揼錢」功能之外，各國明知對救市效用一般，仍咁熱心推出無非係想推低本國貨幣價值，「鬥貶」─—人貶你唔貶好蝕底。結果，QE2未殺到，但金價已屢創新高，其他商品、商品貨幣（澳元）亦升到絕塵。銀紙唔值錢，就要搵其他實物揸手，「磚頭」係最熱門投資，石油、煤炭、貴賤金屬全部都係美金貶值受惠者。

收購行動陸續有來

兗州煤業（01171）喺七月初跌到最低14.5元，呢三個月反彈約三成，但煤炭價格期內只係保持平穩，因為屬於淡季兼且中央「限電令」令電煤需求少，不過踏入秋冬係煤業嘅旺季，而細煤礦逐步冚旗，秦皇島庫存量一路減少，造就煤炭價格下一輪反彈勢頭。

公司早排用66.5億人仔買咗內蒙煤企昊盛51%股權，等採煤要兩三年，但呢次係兗煤走出山東以外收購嘅第一步，相信會陸續有來。

兗煤上半年賺多34%，並發盈喜話首三季賺多至少50%，新投產嘅澳洲煤礦Felix令產量上升，但上半年因為澳元匯價下跌而有10億元的匯兌虧損，由於澳洲紙呢排勁升，呢10億銀有望「回水」，計落今年PE只係10倍左右；銀紙貶值太快，油價重上80美金在望，煤價未來都係易升難跌，長短線都制得過。

戰報

安莉芳（01388）+10%

帥哥九月二十一日推介安莉芳，指中期業績理想，上周四股價高見6.65元，累升10.6%。

匯銀家電（01280）+19%

古晨上周一指匯銀家電業務有新發展，上周四高見2.2元，較推介當日低位1.84元勁升19.5%。

古勝