絲絲講場：日股取消食晏阻力大
全世界嘅證券交易所都要諗計加強競爭力，延長交易時段係其中一個方法，好似香港咁，依家仲諮詢緊，不過就一定延硬，只要中午夠時間食個晏，整體嚟講，經紀都冇乜反對。之不過喺日本就唔同講法，可能因為改革太過進取，據聞反對聲音好大。
東京證券交易所喺七月話建議完全取消食晏時間，令佢哋嘅交易時間可與其他亞洲證券交易所完全銜接，兼且可以增強競爭力，以前佢哋嘅食飯時間都唔係好長，只有90分鐘，仲短過香港。新加坡及香港都差唔多喺七至八月份，提出延長交易時間。
諮詢結果75%人反對
為咗呢個改革，東京證券交易所訪問咗一批散戶，又向機構投資者進行意見調查，得出嘅結果係反對聲音好大，有七成半嘅人反對。
日本喺好多年前都提出過延長交易時間，最終冇下文，皆因業界憂慮要請多啲職員，令成本上漲。至於今次嘅阻力，東京證交所總裁齊藤惇估計，可能與佢哋嘅獨特計價方法有關，經紀嘅憂慮好大。今年初佢哋推出名為Arrowhead嘅平台，完成交易盤嘅時間只需0.005秒，速度拍得住紐約及倫敦證交所。
如果呢個意見調查真係有代表性，日股嘅交易時間睇怕要原地踏步，咁香港會唔會有更大商機？
余絲韻