絲絲記得自從內地發出3張3G牌後，傳媒每次見到三大電訊商阿總，都一定會問佢哋幾時引入iPhone，結果聯通（00762）最先與蘋果公司達成協議，已先後引入咗iPhone 3及iPhone 4，仲賣得好好，而原來聯通與對方傾合作嘅過程係相當艱辛。
據聯通資深副總裁李鋼話，當年與聯通銷售部總經理（原聯通華盛總經理）于英濤一齊同蘋果公司談判時，雙方各自攞出一塊小黑板對住合作條款逐條攻克，每列出一個條款，雙方就會馬上動筆計數。由於與對方簽咗保密協議，李總唔可以披露更多談判細節，佢只係話雙方都基於自己嘅利益角度去傾，所以成個談判過程非常艱辛。
佢又提到只係3日時間，首批近10萬部iPhone 4已賣晒，目前處於斷貨狀態，預計到下月中下旬先能夠完全滿足網上預訂登記客戶嘅需要。
余絲韻