半公幹半休息的五天，又要重新投入工作，繼續上路。如果大家有留意，筆者偶然都有推介股份，都係因為咁樣先至做到「與實戰同步」。
瑞年國際（02010）基本上係一隻筆者由IPO到依家都有留意嘅股份，除咗曾經因為一個消息令佢股價大跌外，基本上又重拾上升動力，如果企定喺6.5元嘅話，佢嘅股價就會好似穿梭機一樣，一飛沖天。
另外，一隻都有提過嘅，就係TCL通訊（02618），當日睇佢，全因為佢嘅基本因素唔錯，加上公司探訪完畢之後，睇到佢哋管理層嘅「雄心壯志」，配合一腔熱誠，先至喺呢度提一提筆，點知，同筆者所諗嘅一樣，有好嘅數據支持確係真，唔同嘅就係多咗瑞銀前金手指陸東嘅出現啦！
如果大家有留意，陸東啱啱做咗TCL通訊嘅獨立非執董，無非都係要話畀全世界知，TCL通訊嘅管治水平又再一次升呢。大家都知，股市有個「名人效應」，即係話「名人一出，誰與爭鋒」，以陸東今時今日嘅金融界個牌頭，簡直就係克勤嘅舊歌──「信心保證」啦！正如我所講，21世紀，品牌係好緊要㗎！
喺投資角度嘅講，陸東某程度成為TCL通訊新嘅核心能力，以佢嘅經驗、同行內嘅脈絡，都有望提升TCL通訊，加上佢哋全新智能手機又正式登場，筆者都見過，有iPhone嘅輕觸式屏幕，加上BlackBerry嘅商務功能，裏應外合，都係嗰句，睇吓啦！
香港大學電子金融服務榮譽助理教授 徐燦傑