絲絲講場：內企駐台設辦首選101
自從大陸與台灣簽訂咗ECFA後，大家都預咗唔少內地企業會去對岸做生意，最基本都要開番個辦事處，台灣最高大廈台北101係熱門地點之一，聽講唔少企業前去探路，仲將101當成喺台灣設立辦事處嘅首選，好似中行（03988）及交行（03328）咁，而內地電子書商漢王科技亦指明要喺嗰度設立據點。
頂新集團魏家係101大樓嘅大股東，集團總裁魏應交對於大陸公司會湧駐101大樓嘅講法反而有啲保留，佢話目前仲未有好多大陸企業進駐，ECFA到依家似乎係「雷聲大雨點小」！早前的確有五大銀行嚟參觀，仲話非常有興趣添，但到依家都未簽約，相信對方應該係對台灣市場及營業額做緊評估，再決定據點嘅規模，佢就話好有信心遲早都做到大陸企業嘅生意，只係遲早問題啫。
賺錢靠大陸遊客
雖然仲未有好多大陸企業進駐，但大陸遊客就蜂擁而至，今年參觀觀景台人數等於去年嘅2.2倍咁多，而大陸客就佔咗差唔多一半，八月份仲創下單月16萬人次嘅新紀錄。受惠於大陸客出手疏爽，101大樓營運到第6年終於賺錢，提早兩年達成獲利目標，佢哋話原本真係冇計算到內地客呢個賺錢因素。
余絲韻