絲絲講場：星展亞洲中心開幕
尋日星展集團為佢個亞洲中心DBS Asia Hub舉行開幕儀式，呢個中心佔地34萬平方呎，話晒都投資咗2億坡幣，絲絲自然要去湊吓熱鬧。
逾四成員工進駐
絲絲見到星展一眾高層都有出席開幕儀式，包括主席佘林發（Peter）及執行總裁古普塔，兩位巨頭並與員工打成一片，且親自打鼓為儀式揭幕。Peter好開心咁同絲絲講，話呢個亞洲中心係佢哋營運策略嘅重要一環，之後星展會有超過四成嘅員工都會搬嚟呢度返工，佢又話星展喺台北嘅全新總部亦已於上周開咗幕。
新嘅亞洲中心唔單只靚，喺大廈嘅大門口仲有個大型雕塑，Peter就介紹話，呢個雕塑係出自中國藝術家高孝午之手，絲絲唔明白點解個個雕塑都係彎晒腰鞠躬，Peter解釋話代表佢哋謙卑嘅服務態度喎，唔知啲雕塑係咪度身訂造嘅呢？
余絲韻