滙控（00005）主席「爭奪戰」好似電視劇咁峰迴路轉，短短一個月間，管理層就大執位。喺今年二月先至話常駐香港嘅行政總裁紀勤，佢今次真可算係「旋風式訪港」，據聞佢喺香港嘅安樂窩至今都未裝修好，佢就已經同滙控講Bye bye，剩番兩、三個月，唔知佢會唔會去呢間大班屋住吓，如果選擇唔住，就要繼續住酒店喇。
滙控一向喺山頂中峽道有間大班屋，紀勤由倫敦搬嚟香港前，屋主係亞太區主席鄭海泉。呢間大屋換親屋主都要大事裝修，閒閒地都搞幾個月，就係咁，紀勤喺香港咁耐，一直都寄居高級酒店，據聞係中環嘅四季酒店。點知間屋都未裝修完，紀勤就遞信唔撈。
候任行政總裁歐智華會唔會住山頂大班屋就仲未知，就算住可能又要改裝吓，襯番自己口味。據講歐智華一啲都唔抗拒喺香港住，幾年前佢已經喺麥當勞道買咗個單位，有二千幾呎，一般人可能覺得夠晒大，但依家貴為候任大班，就似乎細咗啲。老友話，佢間屋位處大廈嘅極高層，景致非常好，仲可以睇到滙豐總行。嘩，咁咪日對夜對囉！
講咗咁耐，絲絲都有向滙豐發言人求證過，不過靚女公關就話No comment。查實點都好，最緊要都係有個安樂窩，放工返屋企可以瞓得好。
余絲韻