市場熱線：一拖追落後水位足

溫情總理下月初趁去比利時出席亞歐首腦會議之便，順便會去土耳其、希臘同意大利呢幾個窮國訪問，唔使問阿貴會幫手「濟貧」。祖國依家同花旗及東瀛周不時有外交風波，但同歐洲關係則搞得唔錯，所以歐洲各國對人仔升唔升值一向冇乜意見。奧巴馬話會拉攏盟國齊齊向人仔施壓，睇落未必好多盟友睬佢。

國美今日決戰成焦點

講番人仔，連升8日之後開市先行回落，但跟住又創盤中新高。溫總話人仔只會逐步升值，雖然人仔中秋前睇落「好勁」，但累計升幅其實僅1個巴仙多啲，同期美匯指數已跌穿80，人仔升值只係「好睇唔好食」，應酬吓班美國佬而已。祖國魚缸復市亦有運行，冇理新一輪樓市調控政策，不過，滬綜指之前6次升到2,700點就打回頭，今年A股就算唔係全球最差亦接近矣！

今日嘅焦點肯定係國美（00493）股東會莫屬，無論你係唔係國美股東，淨係睇兩大陣營點鬥法已非常精彩，會議前夕除咗拉票，黃光裕陣營更加出錢增持股權，令雙方更加勢均力敵，祖國傳媒每日都大篇幅連載報道，有人估計黃光裕今次咁「把炮」係獲阿爺撐腰，阿爺唔想第二大電器零售網絡落喺美資手上。

假如黃方陣營贏咗嘅話，國美命運如何有待下回分曉，大不了將成個殼出售，一個寡頭壟斷嘅零售網絡不愁冇人要，淨係郭台銘舊年都話要喺大陸開萬間電器零售店，接手國美就最乾手淨腳。

尋日3隻紅酒股都大升，茅台上個禮拜連續兩次加價，一年之內累升一倍，高級白酒升得咁勁，會否帶挈埋紅酒不得而知，但不失為一個炒上嘅藉口。不但酒類，祖國樣樣都加價，農產品更加係推高通脹嘅元兇，本地上市嘅農業股冇幾多，睇好農業股嘅多數會諗隻一拖（00038）。

農機市場料穩步增長

一拖上半年收入僅升11%，但卻賺多55%，主要係大中型拖拉機銷售上升，除抵銷小型拖拉機銷售下跌嘅影響之外，並帶動毛利率提升。此外，受惠於4萬億人仔的基建投資，集團工程機械業務亦轉虧為盈。

管理層話下半年國家55億元農機購置補貼資金將逐步到位，為農機市場平穩增長提供有力保障。

不過，農民通常喺上半年買農機，公司中期賺2.62億人仔，全年成績表唔可以簡單「乘2」去計算，但綜合大行預測，一拖全年約賺3.7億人仔，計落PE都係12倍幾，比起其他紅色分子的確幾吸引；兼且第一次派中期息12分，全年息率應該唔差，同係做機械嘅中國龍工（03339）同三一（00631）已經飛天，一拖追落後大把水位。

戰報

福山能源（00639）+10%

高仁於二十四日推介福山指股價有望回升，昨日高見4.89元，較推介當日低位升10.38%。

中國建築（03311）+10%

帥哥於上周五估計中國建築整固完可展新升浪，股價昨日創4.8元上市新高，累積升幅10.1%。

古勝