孖妹缸湖遊：港股加鐘搵食艱難？

睇番港交所嘅建議，證券、股票期貨及股票期權市場嘅交易時段會提前至早上9時30分開市，指數期貨及指數期權就改為上午9時15分。至於廣受討論嘅午休時段，港交所就有兩個建議，係分別縮短至只有一粒鐘或一個半鐘，但所有建議並唔涉及下午四時嘅收市時間。講真句，依家市場普遍支持「加時」，不如趁未有定論之前，聽吓金融界人士嘅意見。

宜開九收五睇齊星洲

羅：交通銀行首席經濟及策略師羅家聰

高妹：聰爺，港股「加時」對經濟有冇影響架？

羅：唔關經濟事喎，未來環球金融市場一體化，港股要爭取環球資金，一早就要加時。如果提早至9點半開市，港股都只係與A股一樣，其實應該要早過佢先啱。港交所與新加坡交易所嘅國際經濟背景及排名都差唔多，人哋開九至五，又唔見人哋話有技術困難？

莉莉：咁即係我哋要參考星交所嘅交易時段？

羅：咩參考呀？直情要抄人啦！我認為港股應該開九收五架！

高妹：另外有啲券商及經紀又話，唔想Cut太多午飯時間喎。

羅：冇Lunch time唔代表冇飯食，醫生、警察、記者有固定嘅Lunch time咩？咪又係以輪更制度食飯。依家係啲證券行難搞，因為交易時間延長，人手安排就要再分工，加上證券行生意難做，佢哋計唔掂成本呢條數。延長交易時段對香港嚟講，係關乎公眾利益而唔係小眾利益，佢哋反對只會阻礙香港金融中心嘅發展。

莉莉：但有人話下午收市延遲，交收方面會有困難喎。

羅：匯市24小時運作都係咁啦，有啲大行都喺度做緊架。港股話就話開十至四，事實上有邊個做股票嘅唔係返早收晏？交易時段延長，股票數目咪一樣咁多，炒家又係繼續睇番嗰啲股票，只係部電腦開多幾粒鐘啫。好似政府推行禁煙咁，要強硬啲，你實行咗就一定會有人跟架喇。

法興證券（香港）何文略指中港股市交易時段同步，對ETF交易有正面幫助。

僑豐金融許照中話，中午休市時段要考慮業界嘅生活習慣。

與A股接軌有利ETF

何：法興證券（香港）董事總經理何文略

高妹：港交所話延長交易時段，其中目的就係與內地A股接軌，咁對香港嘅ETF（交易所買賣基金）成交有冇幫助？

何：部分喺香港上市嘅ETF追蹤A股，兩地股票交易時段更加同步，對ETF一定有正面幫助，例如價格上會同A股更加貼近，追蹤誤差可減少，透明度增加之餘，亦可以更加充分反映市場變化，當然我都希望到時港股ETF交易量會增加多啲。　

許：僑豐金融行政總裁許照中

莉莉：你身為港交所董事，自己又做證券行，點睇延長交易時段？

許：你都知我係港交所董事身份，依家又做緊業界諮詢，我唔方便講嘢。我只能夠講，短期而言，中午休市時段要考慮業界嘅生活習慣及工作需要，時間上唔可以突然間縮短太多，但長遠而言可以取消。

資深出市員：開早OK

喺港交所做股票交易員超過20年嘅胡先生笑說：「早開市冇問題嘅，最多咪早少少返工，不過食飯時間就支持縮短至一個半鐘，收市就維持下午4點啦，因為銀行未必做得切交收。」佢直言若大市氣氛唔好，港股每日開足24小時，周六開埋市都冇用，有時唔係開得耐，生意就會多架！時間長或短都好，散戶都一樣係咁掛盤，投資策略唔會有大改變。

不過，全職散戶陳先生反而覺得：「如果恒指4點半收市，期指收4時45分，都仲喺寫字樓上班時間之內，呢個方案會行得通。」但係佢就唔贊成縮短午飯時間，因為中環人多，要花更多時間周圍搵位食飯；若提早開市，自己又趕唔切由荃灣過嚟中環嘅證券行。所以佢話最理想係上午時間唔郁，下午就開2點，收4點半囉。

86.9%散戶加注人仔投資

九月中以來，人民幣匯價連續多日創新高，累計升逾1%，你會增加哪種人民幣投資呢？據今期《東方產經》網上民調，截至上周末晚上6時嘅結果顯示，26.7%人選擇人民幣定存，24.3%人選擇人民幣債券，22.8%人選擇人民幣受惠股，13.1%人揀其他人民幣相關產品，其餘13.1%人就話唔會增加人民幣投資。

高妹、莉莉

若有料報畀高妹同莉莉或有嘢問，可電郵money.biz@opg.com.hk