上星期，應保險業界其中一個機構邀請，為佢哋嘅會員分享一個為時2小時嘅講題，題目叫做財富管理2.0！大家都知，近呢幾年，金融機構已經進入咗一個單一市場嘅階段，唔同嘅機構都以財富管理成為佢哋嘅發展或者吹水嘅重點，雖然做嚟做去都係嗰幾隻產品，但係財富管理嘅需求性又真係冇改變過。
如果大家記得，財富管理嘅目標係要打倒通脹，另外就係為人生唔同嘅目標，例如退休、子女教育計劃等等作好準備，都咪話唔頭痛。以讀MBA為例，一個唔覺意又二十幾三十萬元，都咪話唔一刀切。財富管理嘅大浪係由二○○四年開始，金融海嘯之後回落，然後因為各大國聯手救市，令到股市喺咁嘅情況下飆升到依家嘅位置。
要理財，一定要有策略，財富管理亦都正式進入2.0嘅階段，意思係指以前財富管理其實係財務策劃，着重感性銷售較多，少放心機喺市場走勢，依家就要擺重喺組合管理，除咗投資外，仲要有恒心去跟蹤同定期去審視自己嘅組合。唔係投資咗一段時間後，都係得個「桔」，咁就白白浪費咗投資者嘅精神心血同時間值，咁樣真係非常之唔抵。
筆者將財富管理以太極嚟比喻，太極代表陰陽互補，所謂「孤陰不生，獨陽不長」，最主要係擁有改變嘅意思，老土講，即審時度勢，見機行事啦！
香港大學電子金融服務榮譽助理教授 徐燦傑