絲絲講場：滙豐推網上美股買賣
道指重越一萬關，好多股民與絲絲一樣，都心郁郁想投資美股以分散風險，但偏偏喺香港買賣美股又唔係咁容易。滙豐尋日推出全新「網上美股買賣服務」，畀客戶有多一個渠道，喺啟動儀式上，滙豐以美國交易所為背景，滙豐香港區個人理財業務主管麥倩華及滙豐亞太區個人理財業務財富管理業務區域主管李錦榮（Bruno）仲學足美股開市咁敲鐘三下！
佢哋仲即席示範點樣透過滙豐「股票全速易」平台買入美股，而揀選做示範嘅股份，唔係滙控嘅美國預託證券，而係「股神」巴菲特旗下嘅巴郡，皆因巴郡係全美國最貴嘅股份之一，買一股要成12.5萬美元，但滙豐都只係收18美元嘅經紀佣金，顯示佢哋嘅收費具競爭力。Bruno話，目前只有約2%嘅香港投資者參與外國股市，相信隨着呢項服務嘅推出，客戶喺美股嘅參與度會有所提升。
恒生委任獨立非執董
另方面，恒生銀行（00011）董事會宣布，委任震雄集團（00057）執行董事兼行政總裁蔣麗苑及美心食品主席兼董事總經理伍偉國為該行獨立非執行董事，為期3年。
余絲韻