近年唔少銀行搶攻新興市場，例如渣打（02888）就喺印度發展得有聲有色，佢哋睇重印度市場唔係齋講，CEO冼博德就身體力行，申請印度嘅身份證明文件──PIO Card，第時飛去印度可以唔使簽證，巡視業務就更方便。其實冼博德一向都鍾情印度，幾年前已經入紙申請PIO Card，依家仲等緊政府批准。
諗真啲，渣打嘅業務集中喺亞洲，管理層經常要英國、亞洲兩邊走，冼博德都話自己成日周圍飛，重話有六成工作時間穿梭於亞洲及中東之間。既然係咁，點解唔索性搬埋個總部去亞洲呢？冼博德就話家陣唔少營運工作已經放咗喺香港、新加坡等地，渣打總部現時就冇計劃要搬。
話雖如此，佢亦補充話如果英國嘅經營條件太惡劣，佢哋都要為股東着想，諗吓係咪繼續駐紮英國。
對於《巴塞爾協定三》，冼博德就話有唔少細節仍未清晰，未來有大把工作要做，特別係要保障銀行穩定之餘，又要保持效率，繼續推動經濟復甦。話說回來，雖然亞洲新興市場嘅表現唔錯，估計渣打仍可以靠呢啲海外業務獲利，但冼博德強調唔會掉以輕心，因為假如西方出現問題，喺出口、資本流向等方面可能會影響到新興市場。
余絲韻