孖妹缸湖遊：股海財技 高人拆招

黃森捷（SJ）任職多家上市公司嘅獨立非執董，亦曾獲拿督勳銜及世界傑出華人獎，代表作係有份幫盈動（電盈（00008）前身）借殼入股得信佳上市。孖妹稱SJ為「財技高人」，佢笑言自己只係閒人一個，應該係「財技閒人」。

SJ：軟庫金匯亞洲創辦人黃森捷

財技1 股本重組 「抽水」伎倆易接火棒

「股本重組」係指公司會利用發行新股、配股或可換股債券（CB）以增加市場股數，據規定，發行新股嘅股價須高於股份票面值，所以公司通常會先透過合股以提高股價，之後再削減股本令票面值下降。

莉莉︰如果上市公司要「抽水」，會點樣決定集資形式？

SJ︰可換股債券係其中一個較快捷嘅集資伎倆，原本CB係好嘅融資工具，喺九五至九八年CB交易最為活躍，多數係由較難向銀行借錢嘅中小型公司採用，透過兩個股東直接交易，佢哋通常會揸到尾；但依家CB有少少變質，好多時交投並唔活躍，股東只好當股票嚟揸，呢三年會計制度改變，就少咗公司發CB。

莉莉︰背後會有乜嘢蠱惑招？

SJ︰市場上有公司會透過買CB持有公司控制權，佔有5%股權就要公布，但股東可以用CB拎到較大控制權，只要未將CB轉換，就冇人知你手握眾多股權，避過監管機構查詢。通常有收購就會發CB，當單一宗交易令公司發CB時，目的就值得懷疑，股民要知道背後邊個係揸住較大控制權，但呢樣唔係公開資訊。另外，若公司向基金發CB，但又向股民發股，股民要留意以免接火棒，所以始終用現金收購係最實在。

莉莉︰你個人揀細價股有乜嘢心得？

SJ︰優質細價股最好集中一項業務、公司經營咗幾年時間；最重要係派息政策，公司知道將盈利嘅幾多百分比拎出嚟回饋股東，派息唔需要高，每年股息率5%至6%已經好吸引。

財技2 借殼上市 箇中陰招炒高散貨

「借殼上市」即係透過收購已上市公司，獲得控制權及上市地位，或將公司部分業務注入殼公司，例如「體操王子」李寧入股嘅快意節能（08032）以及周星馳入主嘅比高集團（08220），分別「變身」為運動股及電影股。

高妹︰部分公司一年內配股4、5次，背後有乜嘢陰謀招？

SJ︰如果大股東買咗個殼公司返嚟未翻到身，佢就會不斷炒高散貨畀其他股民，叫唔同嘅「新股民」入局，大陸公司通常首先會邀請同鄉接貨，自己只係出細份錢；香港情況真係好得意，呢批「新股民」損手後，梗會有下一批「新股民」接貨。歷史一直重複遊戲，「今日嘅電盈，明日嘅乜乜」，大家要自己諗喇。

高妹︰散戶點樣跟風得嚟又轉到身？

SJ︰最離譜係見過有股東只用3個月時間買殼升值，再轉手畀其他大股東，抽完水即走人。散戶要清楚公司買殼成本以及批貨去咗邊啲人手上，先至好追入，仔細留意市場公告有時會發現蛛絲馬迹。

高妹︰名人入主殼公司，殼股變身後係咪可以起死回生？

SJ︰名人效應對上市公司嘅幫助只係非常短暫，以我嘅經驗，新項目超過九成都係失敗，所以公司未有任何項目確實前，散戶都唔好買貨住，即使確實後，都要計算對上市公司貢獻有幾多。

高妹︰殼股係咪多數都係呃錢收場？

SJ︰借殼上市唔係錯嘅事，中信泰富（00267）當年都係買殼上市，依家規模做到好大，每年都有派息。至於當年盈動入主得信佳，當時投行有宗旨，只會愈批愈高，得信佳由16仙升到2.4元，都覺得好神奇，之後股價再去到24元，我自己都開始信埋一份，凡事有兩方面睇，買盈動嘅散戶係輸咗錢，但管理層始終創立咗數碼港等，成就咗件大事。

後市點睇 續炒上落吼買新貨

莉莉︰喺依家市況買細價股抑或大藍籌較好？

SJ︰港股整體價錢合理，但唔覺得特別平，估計恒指今年都喺19,000至23,000點上落。投資大價股嘅盈利未來只會跟隨香港經濟步伐，難有三至四成甚至一倍嘅盈利增長。至於細價股，散戶睇唔通最好唔好玩。事實上，市場上有咁多新股及半新股，等市場冷靜後，股價變得合理，就值得散戶買入。

高妹︰你睇好邊一類股份？

SJ︰我認為大陸消費股、某類農業股及商業收租股都值得投資，例如361度（01361），以3.61元上市，毛利率有增長，現價唔算貴。

莉莉︰中國獨立經濟學家謝國忠預言內地會加息閂水喉，香港樓市喺明年中「爆煲」，咁你又點睇樓市？

SJ︰我諗唔會明年中咁快，本港樓市前景唔單只受經濟牽連，仲受到利息環境及資金流動性影響。我估計美國未來5年經濟依然低迷，亦冇加息條件，明年都唔會加息，不過始終人民幣與美元匯率有聯繫，息率亦有關聯，當市場對美元失去信心時，即使美國經濟仍然低增長，美國最終會跟隨中國被迫加息。

高妹︰咁幾時會加息？樓市仲可以升幾耐？

SJ︰至二○一二年美國會被迫加息，息口會調高到2至3厘，但對樓市影響唔大，加到5厘以上就有大影響。依家大量熱錢一直流入中港，資產泡沫正形成，我唔排除樓市會繼續升，大陸人仲好鍾意買香港樓，與中國基金嘅基金經理傾偈時，佢哋話有多餘錢都會拎出嚟買樓。

78.5%股友撐延時交易

業界對港股交易時段應否延長意見紛紜，港交所（00388）上周就此推出正式諮詢文件，你贊成延長港股交易時段嗎？據今期《東方產經》網上民意調查，截至上周末晚上6時，話贊成嘅佔大多數，有78.5%，其餘21.5%就話唔贊成。

高妹、莉莉

若有料報畀高妹同莉莉或有嘢問，可電郵money.biz@opg.com.hk