內地體育用品競爭激烈，宣傳策略愈來愈重要，好似李寧（02331）早前換上新LOGO，又搵咗多名體育明星做代言人，今次輪到佢嘅對手匹克（01968），不過佢地唔係轉LOGO，而係由籃球市場發展至網球市場，第一步就係簽咗網球女明星奧爾加‧格沃特索娃（Olga Govortsova）做代言人，與國際女子職業網球巡迴賽（WTA）簽約，成為亞太區嘅贊助商。
向來以籃球用品市場為主嘅匹克，佢地早前搵咗12位NBA球星做代言人，仲帶埋其中5位NBA球星去大陸18城市做「親善之旅」。為咗係競爭激烈嘅情況下突圍而出，公司今次有新突破，進軍網球用品市場，佢簽咗格沃特索娃成為首位網球代言人，而且同WTA合作生產網球產品，係全國嘅匹克店舖都有得賣。匹克嘅首席執行官許志華話睇好中國嘅網球市場，認為發展潛力大，有助公司國際化同專業化。
余絲韻