iPhone4推出至今只係個幾月，已經旋風式俘虜咗唔少人嘅心，幕後功臣唔少得富士康（02038），因為郭台銘揼本喺日本買咗1,000部機器，專門用嚟製造金屬手機殼，可想而知郭總對iPhone4幾咁重視。而且嗰時又正值公司受到員工相繼自殺事件影響，絲絲聽講郭總嗰排日日做十六個鐘，一日三餐都喺辦公枱上面搞掂，好似染髮呢啲私人事都要等到夜晚11點先有時間去整。難怪有句傳聞話「如果沒有郭台銘，就沒有喬布斯的今天」，依家深圳廠房每分鐘就製造出90部iPhone4，真係犀利！
其實就係郭總嗰份遠見同毅力，成就出今日嘅「電子王國」鴻海集團。話說當年只有23歲嘅郭台銘，膽粗粗向阿媽借咗7,500美元，租咗間舊屋開始做黑白電視嘅頻道轉換按鈕，之後好快就接到知名品牌定單。80年代時，佢足足喺IBM出面等咗3日，再加上佢嘅口才成功得到IBM生意，所以唔少人都好佩服佢嘅熱誠同毅力。
余絲韻