孖妹缸湖遊：財金波牛演繹炒股

孖妹額頭除咗鑿住個「靚」字之外，其實仲有「運動健將」呢4個字，所以早前舉辦嘅「第5屆金融界精英籃球總決賽」，我哋都有去捧場。記得當日戰況激烈，各隊人馬為咗贏波，紛紛施展渾身解數，簡直可用「球影滿場飛」去形容，經過3個幾鐘頭嘅連場激戰，終於由不同金融界人士組成嘅「狂牛隊」奪冠，恒生銀行隊屈居亞軍，季軍就由滙豐隊獲得。

藺：富昌證券總經理、「狂牛隊」領隊藺常念

炒股打波都要反應快

高妹：藺Sir，喺講籃球之前，不如講吓港股先啦！

藺：唉，歐洲又有新一輪銀行危機出現，搞到今年恒指目標要由26,000點降到23,000點；歐洲佔咗全球四分之一嘅經濟份額，歐洲衰，亞洲都會受拖累。

莉莉：家電股炒得七七八八，咁仲有乜嘢板塊可以炒呀？

藺：博航運股啦！股市輪流轉，航運股落後，有機會炒上，大家可考慮中國遠洋（01919）及中海集運（02866），目標價分別為9元及3.5元。

高妹：你身為「狂牛隊」領隊，本身啲波勁唔勁先？

藺：咁多種運動之中，我最鍾意就係打籃球，因為我射波幾準，人哋以為我淨係識左手走籃，點知我右手都可以，哈哈！我由中學開始就打波㗎喇！

莉莉：咁打波同炒股有冇共通點？　

藺：好似近期零售股係咁升，如果你有睇新聞，就會知道當有零售數據出咗，只要跟住去買，咁就會贏錢；打波都係一樣，當有勢色唔對時，你就要識得交波畀人，兩者戰術都係要打鐵趁熱，反應要夠快。

馮：恒生商業銀行客戶關係部高級副總裁、「恒生隊」隊長馮康

聽冧巴慘蝕吸取教訓

高妹：你讀書時打波好勁喎，做過隊長，又試過拎MVP（最有價值球員），喺恒生內部籃球比賽時，又有「神射手」稱號，你投資一定好叻喇！

馮：我第一次炒股都損手爛腳㗎！因為聽「冧巴」搞到輸咗3個月人工，嗰次真係極度唔開心，但就令我學識睇技術分析及留意市況。後來入咗恒生，我喺不同部門都學咗唔少財金知識，對金融產品亦了解多咗。

莉莉：「失敗乃成功之母」，咁你試過最勁賺幾多錢？

馮：二○○七年股市好旺，當時我試過買中國鋁業（02600）賺超過10萬蚊。不過依家我做銀行，買賣股票都要申報利益，唔可以短炒股票，所以都係買基金為主。

調節心理 忘記前失

高妹：咁打籃球同買股票，贏嘅秘訣係咪都一樣？

馮：兩者都要有良好嘅心理調節，喺球場或股場，冇人會想輸波或輸錢，所以當你行錯第一步時，千萬唔好再諗返轉頭，反而要忘記之前嘅錯失，唔好畀負面情緒影響，咁樣下一步先至可以做得更好。

莉莉：唉，我咪係因為心理質素差，所以成日輸錢囉！

馮：如果投資永遠唔做止賺及止蝕，咁你多數都係輸多過贏。打波一樣，即使你已經拋離對手好多分數，但未到完場最後一分鐘，人哋都有機會追上，所以投資同打波嘅心得，就係唔好畀一時嘅勝利沖昏頭腦，記得要冷靜。

H：「狂牛隊」中鋒Hudson

學生當見習鍛煉炒藝

高妹：我知你打開職業籃球，你點睇今次決賽對手恒生隊嘅質素？

H：恒生隊真係打得好有隊形，我對於8號嘅隊長馮康最有印象，佢打得好有水準，而其他隊員嘅表現亦好穩定，以業餘嚟講，佢哋真係打得唔錯。

莉莉：你喺富昌證券做過見習生，學咗啲乜呀？

H：讀中學嗰時，我對經濟及數學已經有興趣，大學畢業後我都希望加入金融界工作。我之前主要跟藺Sir學睇股市及股票，因為我仲未有實際嘅投資經驗，所以藺Sir平時都會同我分享佢嘅投資心得。

「球場如股場」，打波之前做熱身，炒股之前做功課，其實道理一樣。孖妹覺得「世上無難事，只怕有心人」，只要你肯付出，做「中國姚明」及「股神巴菲特」有幾難呀？大家加油啦！

50%散戶買零售人債

今年首批散戶可參與認購嘅人民幣債券，由中國銀行（03988）喺本月八日發行，2年期及3年期票面息分別為2.65厘及2.9厘，唔知散戶會唔會認購呢？據今期《東方產經》網上民調，截至上周末晚上6時嘅結果顯示，50.5%人話會認購，33.3%人話唔會，其餘16.2%人就在考慮中。

高妹、莉莉

若有料報畀高妹同莉莉或有嘢問，可電郵money.biz@opg.com.hk