講起債券，大家又點會唔記得○七年搞到滿城風雨嘅「雷曼兄弟」債券呢！全因為佢，成個經濟都畀佢搞到依家唔上唔落，真激氣！
中國成為全球經濟嘅指標一日一日咁明顯，近期，大家見到人債全面喺香港登陸，都咪話唔令大家為佢喝采，呢排，近住「十‧一」，政策市概念正式啟動，人債又全面發售，加上金管局「審時度勢」咁配合，簡直係「火上加油，又再炒一轉」。雖然今次係債券，但今次全城熱烘嘅係Big 4四大錢莊之一嘅中行（03988），有阿爺做最強後盾，我老竇都識講「阿爺照，使乜驚！」。
有事，阿爺又點會見死不救呢？加上股市近期「左一巴，右一巴」，以穩打穩紮嘅狀況下，似乎人債會帶動一股新嘅旋風，加上同人仔升值又「雙龍出海」，睇怕大把內地錢莊又會有樣學樣，齊齊喝采。
之前都講，香港依家用盡計仔希望自己同內地嘅連接度大大提升，形成咗一個「中港金鐘罩」，亦都令到成個遊戲更加好玩，教書嘅時候，都有教過一個分析架構叫「PEST」，唔好以為全部都係均等啊！只要個P：Political（政策）有動作，其他E：Economical（經濟）、S：Social（社會）加埋T：Technological（科技）即刻提升，仲使講嘅，政策喺中國梗係最大㗎啦！
如果人債旋風式襲港，咁真係要留意吓中銀香港（02388），分行多，人債大拆家，加上又係人民幣結算大佬，除非人仔唔得，否則，中銀香港應該得，望吓啦！
香港大學電子金融服務榮譽助理教授 徐燦傑