日本航空因財困需要重組，當地航空業一片愁雲慘霧，但所謂「有危亦有機」，ANA（全日空）宣布搶先成立日本首家廉價航空公司，佢哋引入嘅外資叫入意外，就係來自本港嘅私募基金界紅人——諸立力（Victor Chu）嘅第一東方投資！
由20年前搶先成為首批投資中國嘅私募基金，喺○七年更加協助布蘭森嘅維珍（Virgin Group）尋求購併財困嘅英國銀行Northern Rock，諸立力喺環球私募行業屬於明星級人物。雖然日本嘅航空業多年來甚少獲外資參與，今次諸立力罕有地選擇由第一東方直接出資，而並無透過旗下基金參與，舉動備受私募基金行業中人嘅關注。
喺呢間新嘅廉航公司，ANA會持股39%、第一東方佔股33.3%，而餘下27.7%則由其他日本投資者持有，新廉航將於明年下半年投入服務，初期先拓展日本本土航線，其後網絡將逐步向日本往來中國等短程國際線擴展。據了解，新廉航以大阪關西作為據點，飛去東京成田嘅機票約只需5,000日圓（約463港元），價錢甚至平過大阪去東京嘅子彈火車票價，可算為日本嘅航空事業揭開新一頁。
余絲韻