絲絲講場：城電請傑出夥計遊星洲
本港電訊業競爭激烈，個別營運商為嚴控成本，將工作大規模外判甚至將前線員工凍薪早已司空見慣，但凡事總有例外，例如城電（01137）由於業務擴展，目前中港兩地已有超過三千名全職員工，為咗慰勞傑出員工，公司最近更請部分前線同事去新加坡旅行。
清潔員工一樣有份
「魔童」王維基近年為城電推行專業管理嘅同時，公司亦已積極提升對員工培訓與聘用條件，公司更有明確政策，每年可能會將佔薪酬基礎百分之五嘅表現最遜色員工辭退。但有罰亦有賞，城電最近就請咗三百五十名傑出表現嘅前線員工去新加坡旅行，前線員工除咗所謂「街霸」嘅外勤銷售員工、廣州電話中心嘅服務員外，甚至包括辦公室嘅清潔員工，果真係照顧到唔同階層嘅同事。
余絲韻