絲絲講場：花旗高層派餅慰勞手足
成日都聽見啲日資百貨公司間唔中會舉行「感謝日」或「感謝祭」，花旗集團日前亦舉行咗個「感謝日」，不過佢哋要回饋嘅對象，係一班勞心勞力為公司搏命嘅員工。
當日花旗一眾高層空群而出，好似花旗銀行環球個人銀行服務行政總裁及總經理盧韋柏、環球個人銀行服務副總經理周永贊以及花旗集團香港區資本市場及企業銀行業務總裁麥永森咁，佢哋都放低手頭上嘅工作，四出向各部門嘅同事贈送曲奇餅以表達謝意。
搞「感謝日」戴大煲呔
雖然啲曲奇餅唔係呢班高層自己親手焗製，而係購自東華三院旗下專門訓練及聘用殘疾人士嘅社會企業「愛烘焙麵包工房」，但睇見部分高層喺「感謝日」放下嚴肅形象，戴上藍色大煲呔周圍派餅，盡顯親民嘅一面，收到曲奇嘅同事相信都會好開心。
本地銀行業競爭愈嚟愈激烈，由按揭、信用卡以至人民幣業務，瓣瓣都鬥到盡，員工平時承受被「捽數」嘅壓力好大，間唔中都要慰勞吓佢哋喇！
余絲韻