經歷金融海嘯後，要成為亞洲最強企業真係唔易，「第五屆亞洲品牌500強」尋日揭盅，當中仍然係日韓品牌領先，排名三甲嘅分別係韓國三星、日本豐田及香港滙豐。三星及豐田憑藉保持淨利潤嘅持續增長，穩坐前兩把交椅，而滙豐就係唯一名列十強嘅香港企業。
絲絲聽講呢個亞洲品牌500強排行榜，係從市場表現、發展潛力、品質水準及效益水準呢4方面評核。前100強中，日本企業佔過半數有57家，比去年多咗1家，相反內地企業就只有23家，比去年少咗3家。
喺亞洲前十強中，日本品牌共佔據咗6席，除咗豐田之外，仲有東芝、松下及資生堂等港人熟悉嘅品牌，韓國就有三星及LG呢兩個電器品牌佔上兩席。值得一提嘅係，中國移動（00941）依靠增值業務結構嘅多元化，同時淨利潤及營業收入均排名同行首位，今年就取代咗海爾電器（01169）躋身前十名，亦係唯一一家名列十強嘅內地企業。絲絲心諗，中移要做到「亞洲一哥」仍有好長嘅路要行，借鑑日韓企業嘅成功心得或者係一個好辦法！
余絲韻