港交所（00388）行政總裁李小加近期為咗延長交易時間，頻頻與華資經紀團體飯局，繼於兩周前，喺一星期內與六大經紀團體開咗幾晚飯局後，尋晚又與蔡陳葆心擔任永遠名譽會長嘅證券商協會食飯，下周二佢又約咗立法會議員詹培忠及多個經紀團體飯局，唔知會唔會因此而增磅呢？
負責安排下周二飯局嘅詹培忠就話，由於當晚飯局嘅出席人數眾多，最少有28至29人，但飯局時間只有約兩粒鐘，所以會盡量安排每人輪流發言5分鐘。
絲絲計計數，就算每人限講5分鐘，閒閒哋都要兩個半鐘，仲未計李小加都要發言呢！唔知佢係咪想向李小加暗示，啲經紀覺得一粒鐘食飯時間真係唔夠呢？
其實，「加時」傾到呢個地步，華資經紀嘅立場都已經好明確，佢哋希望午休有一個半小時，關鍵係究竟午休時間係12點至1點半，抑或係配合內地交易時間，午休由11點半至1點。不過絲絲聽聞，好多經紀覺得11點半食飯太早，傾向午休由12點至1點半。
證券及期貨專業總會會長王國安就話，至今收到接近600份業界意見，大部分強烈反對縮短午休時間至一粒鐘，認為一個半鐘就較合理。
余絲韻