講開Smartphone智能手機，大家都會聯想到iPhone，不過來自祖國嘅華為亦相當唔簡單，佢哋宣布推出首部自有品牌嘅Android手機IDEOS。華為終端副總裁徐昕泉仲話，佢哋嘅策略係要以價格優勢，將智能手機推向大眾化市場，從而喺智能手機市場實現跨越式增長，實行不讓iPhone專美。
對於華為嘅手機大家可能有啲陌生，甚至可能當佢係「山寨品牌」，但事實上Vodafone、T-mobile、AT&T以至本港嘅各大手機網絡，早已銷售華為以ODM方式代工生產嘅手機，今年上半年華為手機嘅出貨量更達5,000萬部，並位居全國第一。
徐昕泉話，繼去年取得逾50億美元銷售後，今年嘅銷售目標已進一步提升至60億美元。至於打正華為旗號推出嘅IDEOS，係市場上首款專門針對大眾市場嘅Android智能手機產品，有望改變市場對智能手機售價偏高嘅睇法。
IDEOS設計之初就係以售價介乎100至200美元嘅大眾市場作主打，本港代理商Synergy就話本港嘅售價大約係1,800元；數碼通（00315）尋晚就公布，只需以介乎138至298元嘅月費合約計劃，就可以預繳方式獲零機價優惠，睇嚟華為要將智能手機全面向大眾市場普及，絕對唔係得個講字！
余絲韻