僑威集團（01201）近排頭頭碰着黑！佢哋依家以TDR形式喺台灣證券交易所掛牌，早前因為延遲重大訊息披露，被台灣證交所捉到，開咗張5萬元新台幣嘅罰單；事隔唔夠一個月，竟然又擺咗個大烏龍，將上半年中期股息都打錯埋，誤差仲要超過3倍，今次台灣證交所一於冇面畀，要僑威再交多10萬元新台幣嘅違約金。
僑威公布嘅股息出錯，聽講係台灣嘅代理機構將港元兌換為新台幣時計錯匯率，搞出嚟嘅大頭佛。雖然呢次係僑威「主動發現」做出更正，不過台灣證交所覺得，0.0947元新台幣變成0.308元，錯得都相當離譜，仲要三周前先發生過資訊延遲披露風波，咁都唔小心啲，抵畀多一張罰單啦。
因為有愈來愈多港台兩地掛牌企業，台灣計劃加快修改相關法規，台灣證交所副總朱士廷已公開警告啲上市公司，如果再發生「資訊不對稱」事件，以後唔會再好似僑威咁輕鬆，唔單只要重罰100萬元新台幣以上，仲要一年之內都唔准再增發TDR。
余絲韻