絲絲講場：瑞年委代言人谷形象
早排由於氨基酸產品唔合格嘅傳聞，令瑞年國際（02010）股價單日急挫兩成，公司隨即澄清穩定投資者信心，為進一步提升品牌嘅健康形象，佢哋搵咗香港影帝張家輝嘅老婆關詠荷做代言人，佢哋話皆因關詠荷形象親切健康，家庭事業都咁成功，可算係香港事業女性嘅典範喎。
產品代言人好重要，可以引起明星效應，除咗瑞年之外，唔少運動服飾嘅公司都有搵運動員做代言人。
Sell美容健康食品
今次瑞年搵關詠荷主要係Sell護膚美容健康食品，公司話因為呢款產品喺香港推出，所以搵香港女明星代言，希望可提升品牌形象，增加港人對佢哋產品嘅認識。講開瑞年，佢哋專門分銷保健品及涼茶，今年會繼續擴大產能及擴闊產品種類，又會進軍海外，包括新加坡、馬來西亞及台灣。
余絲韻