內地企業進行股份化仍然係大趨勢，喺改組過程中牽涉好多專才，會計師就係其中一瓣。「四大」之一嘅畢馬威已經鎖定目標，要喺內地招聘1,500名畢業生，數吓手指，呢批畢業生可能屬於「九十後」，唔知係咪擔心新一代面對挫折嘅應付能力，佢哋打算提供「員工關懷計劃」，真係照顧周到。
絲絲早排喺上海與畢馬威華東華西區首席合夥人馮光明食飯，佢當時已經話要聘請好多人，主要係應付強勁嘅業務需求。尋日有內地傳媒引述佢嘅言論，話二○一一年度全國應屆生招聘會率先喺上海啟動，計劃喺上海、北京、廣州、深圳等全國範圍內，招收內地應屆大學畢業生約1,300至1,500名。
明年畢業嘅大學畢業生，好多係出生於九○年左右嘅「新一代」，絲絲好多做緊管理層嘅朋友話喺「一孩政策」下，好擔心新一代嘅小朋友係咪有能力應付挫折。畢馬威就好有先見，話會首先為佢哋提供「員工關懷計劃」，即係由經驗豐富嘅經理擔任新人嘅「導師」，幫助佢哋融入新工作。公司下一步就梗係要諗計留低人才，畢馬威就話會搞個「跨國工作計劃」吸引人才。
余絲韻