孖妹缸湖遊：掟貨潮撈股走出迷陣

多隻股份陸續被狂插完一輪後，上周終於有番啲起色（附圖有個3D迷宮，寓意幫你嘅股份搵出路，必須靠智慧），呢啲股票都係受魚缸散戶愛戴嘅，究竟呢次屬短期反彈抑或展開真正升浪？僑豐證券業務發展董事連敬涵及敦沛金融助理副總裁李偉傑就分享己見，佢哋都手持部分「中招」股份。

連︰僑豐證券業務發展董事連敬涵

李︰敦沛金融助理副總裁李偉傑

博反彈先洞悉底蘊

莉莉︰睇番今次嘅迷宮遊戲，你認為邊隻股票最快會搵到出路？

連︰好多隻都唔值得買，A8電媒（00800）業績麻麻，日日都見到新低，3元係個大底部，如果跌穿就要即刻放。依家亦唔係入創維（00751）嘅好時機，之前中央推出以舊換新補貼優惠，呢隻股已經被炒過龍，按常理嚟睇，電視機一年之後好少壞，好難再引嚟一窩蜂嘅人繼續購買，預料公司盈利唔會再向上突破，未來股價最多反彈上5元。至於霸王（01338）生產嘅洗頭水與市面上一般洗頭水差唔多，亦冇特別效果，相信股價會有好長時間「潛水」，短期阻力位係3.7元。巨騰（03336）嘅毛利率都幾低，又冇乜明顯反彈，除非4元可以守得住喇。

莉莉︰睇法都幾悲觀喎，咁你有乜心水股呢？

連︰我睇好曾經被基金拋售嘅國壽（02628），若企得穩29至31元都值得買。多年前都揸咗隻偉仕控股（00856），當時業績唔錯，但公布後基金大量沽貨，急跌15%，我當時叫晒全部客人即刻撈貨，好快就升番上去；依家呢隻股剛公布今年上半年盈利增長16.8%，照樣都有被拋售，我覺得仍然買得過，跌落1.99元可買入，上望3元樓上。

業績唔太差睇準掃

莉莉︰依家揸住呢啲「蟹貨」嘅散戶可以點做？

連︰其實股價若被捽低之後嘅兩至三日都唔肯升，就冇得留，要忍痛沽。對於業績表現好但股價仍急挫嘅股份，建議未持貨嘅散戶耐心等待兩至三天，等股價喘定後就可以撈底。至於插入谷底嘅股份，其實早應該見佢跌時即刻沽晒啲貨，若最終選擇長揸，相信起碼要等多半年先去番高位。

高妹︰部分股份被掟後已起死回生，散戶應該點樣搵呢類股票？

李︰喺今次業績期，企業盈利差以及增長只有單位數嘅股份跌到好低，而大部分有一倍盈利增長嘅股份先受到追捧，如信義（00868）及龍工（03339）近期愈升愈有，明顯見到基金換緊資金落增長動力較大嘅股份。我認為依家係掃平貨嘅機會，近排綜合咗一個撈底策略，就係若股份業績唔太差，但每日波幅有3%上落，當波幅收窄時就係博反彈嘅好時機，但要耐心等候約5至10日，我諗未來一至兩周都可以咁玩法。

撈貨結合基本因素

高妹︰因應呢個撈貨策略，咁邊啲已經大跌嘅股份值得吸納？

李︰可以考慮A8電媒，由於佢哋嘅音樂服務市佔率達9%，公布業績時高層提到公司旗下音樂服務下半年收入得以提高，估計股價會喺3元低位附近橫行，目標價3.8元。朗生（00503）被洗倉後第5日後終見反彈，估計會上番3.8元，距離現價仲有近一成水位。玉米油（01006）都揀得過，內地七月份通脹率（CPI）創近年新高，估計仲未見頂，對食品有穩固需求，玉米油股價調整至4.8元值得吸納。如果唔睇基本因素而純粹博反彈，可以揀霸王，升番6元就有難度，呢轉上望4.5元。

高妹︰市場咁樣洗倉，你有冇中招？

李︰自己持有龍源（00916），出咗業績後，股價由8.5元跌落7.7元，喺低位橫行咗8日後，終於有起色，相信依家係時機再度買入，上望9元，所以對於基本因素唔係太差嘅股份，我嘅撈底模式「等5至10日」都仲用得着，其實股份橫行整固時間愈長愈撈得過。

高妹︰未來仲會唔會有沽貨潮？

李︰依家係業績期尾聲，再大規模下跌機會唔大，估計市場會去番炒作基本因素，未來港股仍然喺大波幅市，短期難出現大突破，直到十月初恒指都會喺19,000至22,000點上落。

基金掟貨 70％股友損手

見到近日唔少股份如國壽（02628）及多隻內需股等相繼被基金拋售，股價大幅下挫，你有冇損手呢？據今期《東方產經》網上民意調查，截至上周末晚上6時，70%人話有損手，其餘30%人就話避過一劫。

高妹、莉莉

若有料報畀高妹同莉莉或有嘢問，可電郵money.biz@opg.com.hk