內地開綜合戶 Victor：我四年前喺內地開咗個綜合戶口，分定期、活期同「活定兩便」存款3種，專儲人仔！依家大約儲咗7,000蚊！大陸開戶息口高啲，要用時又唔使專登兌換！如果預計有一排都唔會返內地消費，咁我就會建議將部分儲款做定期，因為最高息！我都做咗5年定期，年息為5厘。另外，亦可以將大部分嘅錢做「活定兩便」，因為存款可以透過e-banking，將定期靈活轉為活期，流動性高之餘，息口仲較一般嘅活期高添！餘下資金，我會做活期，方便自己幾時用都得！
貪高息揀定存 蘭姐：早幾年就喺香港開咗一個人民幣嘅定期戶口，嗰陣一筆過放咗啲錢落去，做咗幾個月定期，做定期嘅息較高，所以我都係揀做定期囉！如果遲下個息口再高少少，先再加碼啦！
攞雙幣卡方便 卜太：我喺大陸有樓，每個月定期收租擺落內地戶口，當儲人民幣囉！喺上面開個儲蓄戶口好方便，幾時返去都唔使兌人仔，一張提款卡就可以隨時㩒出嚟用！我之前喺香港銀行申請咗張人民幣、港幣雙幣卡，好似可以連結埋香港嘅戶口，應該幾方便嘅！