赴重慶論壇「各自飛」
話說日前阿里巴巴與重慶市外經貿委聯合舉辦「2010年重慶電子商務高峰論壇」，馬雲以及香港上市嘅阿里巴巴（01688）行政總裁衛哲、集團旗下子公司嘅5位CEO都有出席。為免將所有雞蛋放埋同一個籃子內，眾人分批乘搭4個唔同嘅航班抵達。絲絲覺得呢個係負責任管理層應有嘅表現，萬一大吉利是發生空難，整個集團嘅高級管理層即時懸空，邊個嚟主持大局呢？
講番阿里巴巴今次咁勞師動眾去重慶，除咗開會之外，內地媒體就估計其實都係順道實地考察。衛哲曾經透露，集團睇準東盟貿易區嘅商機，屆時關稅下降，重慶等西南地區就成為與東盟接觸的前線。
余絲韻