絲絲講場：滙豐保險義工配對長者
人口老化問題愈嚟愈受社會關注，絲絲知道滙豐保險自從○八年開始就舉辦「滙聚耆情友伴計劃」，旨在將滙豐嘅義工及東華三院嘅長者配對，令義工可與長者建立深厚啲嘅關係，不時關懷陪伴長者。
一年服務3840小時
早前呢個計劃就舉行○九至一○年度嘅閉幕儀式，滙豐保險亞太區保險業務副主管孟學燊親自出席，佢話真正嘅關懷並唔簡單，就好似佢哋嘅義工咁，會不時致電問候、家訪甚至陪伴長者參加節慶活動，照顧長者嘅情緒感受。佢又話喺短短一年內，計劃成功「撮合」咗120對長者及義工，共為長者服務咗超過3,840小時，成績非常唔錯。
閉幕儀式請咗唔少長者出席，雖然絲絲覺得孟學燊未必聽得明公公婆婆講乜，但見到佢仍滿臉笑容，仲戴住愛心手套與長者影相，呢份關懷相信可衝破語言隔膜。絲絲非常鼓勵銀行界搞多啲義工活動，一方面幫到有需要嘅人，另方面可打造企業形象，何樂而不為呢？
余絲韻