港交所（00388）上市委員會不時都會向一啲違反《上市規則》嘅人士作出譴責，為咗提高董事質素，好多時都會要求呢啲違規人士「再培訓」，之不過日前被譴責嘅余錦基，竟然唔聽話，唔肯上培訓班。
上市委員會最近向漢傳媒（00491）、其執行董事王日祥（王晶）以及喺去年已辭咗執董職務嘅余錦基發出譴責。事緣係漢傳媒喺○七年收購和成國際（現稱中海船舶（00651））股份時，余錦基與「晶哥」都未有盡董事應盡嘅責任，違反咗佢哋嘅董事承諾。除咗譴責，上市委員會仲下發指令，要余錦基及「晶哥」上培訓班。絲絲問余錦基做乜咁失策，佢就冇逃避責任，話雖然好多嘢都交畀下屬做，但畢竟做得執董呢個位，點都係責無旁貸。
至於問佢幾時上培訓班，佢話自己年齡唔細，早幾年已打算辭晒上市公司執董嘅職務，但好多時都係為咗幫朋友先至做吓董事，加上自己鬼咁忙，所以佢諗住索性辭埋其他上市公司嘅董事職務，應該唔會上乜嘢培訓班喎。不過佢強調即使佢唔做董事，都可以繼續做投資，只係唔出名，所謂「悶聲發大財」，投資向來都係低調好過高調，話唔定轉為低調投資嘅回報會更高呢！
余絲韻