投行「賓卡」平日好風光，揸名車、歎紅酒，全靠做「刁」收佣，近日香港融資市場咁熱鬧，新股排住隊上市，「賓卡」亦都密密做，冇停手。不過，原來近期啲佣金率愈嚟愈低，《彭博社》嘅調查顯示，今年香港嘅新股上市有37間，數目一啲都唔失禮，但平均佣金率只係2.2%，唔單只低過全球水平嘅3.2%，亦係近10年最低。點解收得咁平？原來呢個數字係受到「新股集資王」農行（01288）所拖累。
話說農行喺香港上市，集資額有成220億美元，一早令到班「賓卡」好鬼雀躍，成個新股市場好似翻生咁，中環老友都諗住食住農行條水實冇死。
點知，農行臨尾大減承銷商嘅佣金，據聞只係得1.96%，與當年中行（03988）及工行（01398）嘅2.5%真係冇得比。
農行減「賓卡」佣金係有原因嘅，皆因有成40%嘅基礎投資者係農行自己搵返嚟，有乜理由畀班「賓卡」賺呢筆佣？投行都冇計，惟有「收順啲」。呢個咁有道理嘅道理，據聞係由農行副行長潘功勝度出嚟。
若然撇除咗農行因素，平均嘅佣金率都有2.96%，之但係咁，近年香港上市嘅公司規模愈來愈細，啲「賓卡」惟有「密食當三番」啦。
余絲韻